1. Што е ХПВ инфекција?
Гениталната ХПВ инфекција е полово пренослива болест предизвикана од хуман папилома вирусот. Името се однесува на група вируси со повеќе од 100 типови, од кои повеќе од 30 се полово преносливи. Кај повеќето кои се инфицирани од ХПВ не се јавуваат никакви симптоми, а инфекцијата поминува сама од себе. Типовите на вирусот кои покажуваат сериозни абнормалности на пап тестовите се нарекуваат „типови од висок ризик“. Инфекцијата од овие типови може да доведе до развој на карцином на грлото на матката, вулвата, анусот или пенисот. Другите типови на ХПВ кои обично не предизвикуваат некои посериозни цитолошки нарушувања ги нарекуваме типови од „низок ризик“.
2.Како се пренесува гениталната ХПВ инфекција?
Секое лице кое некогаш имало генитален контакт со лице кои е инфицирано од ХПВ може да е зафатено од оваа инфекција. Ова се однесува и на мажите и на жените кои можат инфекцијата и натаму да ја пренесуваат без да бидат свесни за тоа. Типовите на ХПВ кои го инфицираат гениталниот состав примарно се шират по пат на полово пренесување. Ретко се случува инфекцијата да се пренесе од мајката на детето по пат на вагинално породување.
3.Кои се симптомите и знаците на оваа инфекција?
Повеќето од носителите на ХПВ воопшто не знаат дека се инфицирани. Вирусот живее во кожата или во слузокожата и обично не покажува никакви симптоми. Кај некои луѓе се јавуваат кондиломи или промени кај грлото на матката, вулвата, анусот или пенисот. Кондиломите се јавуваат во вид на меки, влажни, издигнати, рамни или папиломатозни, поединечни или повеќе творби со розова или црвена боја. Тие можат да се појават и по неколку недели од половиот контакт со инфицираното лице. Методите на отстранување вклучуваат апликација на креми од страна на пациентот или разни методи кои ги одредува доктор. Ниту еден тераписки метод не е генерално подобар од некој друг, ниту, пак, е идеален за сите случаи на ХПВ.
4.Како се дијагностицира?
Кај жените ХПВ се дијагностицира преку пап тест. Исто така, постојат и специјални тестови за утврдување на присутноста на вирусот во организмот. Кај машките сè уште не постои соодветен тест за дијагноза на ХПВ инфекцијата.
5.Која е поврзаноста меѓу ХПВ и карцином на грлото на матката?
Сите типови на ХПВ можат да покажат благи промени во пап тестот без сериозни последици, но некои од нив можат, во ретки случаи, да доведат до карцином на грлото на матката. Од друга страна, кај многу мал број жени ХПВ инфекцијата се задржува подолг период, и како таква таа претставува ризик за развој на карцином на грлото на матката. Со редовни гинеколошки прегледи навреме се утврдуваат почетните промени на грлото на матката и се почнува соодветен третман. За тоа колку е важен редовниот пап тест, доказ се жените кои се жртви на канцер на грлото на матката само поради нередовно тестирање.
