Кога се споменуваат главоболките најчесто се мисли дека само возрасните се соочуваат со овој проблем. Но, и многу деца имаат главоболки, кои се појавуваат од истите причини како и кај возрасните. Главоболките кај децата се честа причина за консултација со педијатриски невролог. Како и кај возрасните така и кај нив постојат повеќе различни типови главоболки, како периодични главоболки од типот на мигрена или тензиона главоболка (предизвикана од стрес), но и хронични секојдневни главоболки. Симптомите почнуваат најчесто доцна попладне и траат oд 1 до 4 часа. Најголемиот број главоболки во детството не се поврзани со сериозно заболување туку со несоодветен режим на одмор, проблеми во семејството или училиштето, исхрана и физичка активност кај децата.
Мигрена – овој тип главоболка сѐ почесто се дијагностицира кај децата, дури и во доенечка возраст. Таа немора да биде еднострана, главно претставува пулсирачка болка, која се влошува со активност, често постои гадење и повраќање, стомачна болка и пречувствителност на светлина и звук.
Тензиони главоболки – овие главоболки траат од пола час до неколку дена. Помалите деца често престануваат со игра и имаат потреба за подолг сон. Станува збор за болка со благ до умерен интензитет од двете страни на главата, не е пулсирачка и не се појачува при физичка активност, не е следена со гадење и повраќање.
Постои затегнатост (спазам) на мускулите на главата, вратот и рамениот појас. Често се поврзани со стресни моменти во училиште или дома, имаат бениген карактер и добро реагираат на сон.
Cluster главоболки (во групи) – се јавуваат кај поголеми деца, над 10-годишна возраст, во серии од 5 и повеќе епизоди, во различни интервали, од 1 епизода на 2 дена, до 8 епизоди на ден. Станува збор за остра прободна болка од едната страна на главата која трае од 15 мин- 3 часа, следена со солзење, секреција од носот и вознемиреност.
Хронични секојдневни главоболки– овој термин означува мигренозни или тензични главоболки кои се јавуваат повеќе од 15 дена во месецот во период од над 3 месеци. Поврзани се со инфекции, благи трауми на главата и преголема употреба на аналгетици (повеќе од 2-3 пати неделно).
Кога да посетите лекар?
Посетете детски невролог ако главоболките го будат детето од сон, се зачестуваат или стануваат појаки, ја менуваат личноста /карактерот на детето, се јавуваат по пад или удар во главата, се следени со покачена температура и здрвен врат. Фактори што влијаат на појава на главоболка се: инфекција (настинка, грип, инфекции на уво и синуси, но и посериозни инфекции на мозокот – менингитис или енцефалитис придружени и со други симптоми- висока температура, затегање на врат); траума на главата- дури и благи трауми можат да предизвикаат главоболка, но потребен е итен преглед ако главоболката се појачува; eмоционални фактори- стрес, анксиозност, депресија; генетска предиспозиција- особено за мигрена; храна и пијалаци (нитрити- кои се присутни во сланината, колбаси и виршли, како и други адитиви во храната), премногу кофеин (газирани сокови, чоколадо, кафе и чај) или патолошки процеси во мозокот- тумор, крвавење. Секако, при овие состојби секогаш постојат и други сериозни симптоми – нарушување на видот, вртоглавици, нарушена моторна координација.
Како да постапите?
Водете дневник на главоболките – кога се јавуваат, колку траат, провокативни фактори. Направете листа на сите лекови, витамини и суплементи што ги прима вашето дете. Ставете влажна ладна крпа на челото на детето и овозможете му одмор во затемнета и тивка просторија. Дајте му една доза аналгетик на почетокот на главоболката (на пример Ибупрофен или Парацетамол). Не го повторувајте лекот почесто од препорачаното! Практикувајте здрави навики- доволно сон, физичка активност, здрава исхрана. Зголемената тежина и недоволната физичка активност се директно поврзани со појава на главоболки, особено кај адолесцентите. Намалете го стресот – премногу обврски, а недоволно игра и забава придонесуваат за појава на главоболки. Секогаш консултирајте се со педијатар или педијатриски невролог и придржувајте се до терапискиот план.
