Дали сте забележале наутро дека се будите со отечени прсти? Причина за ова може да бидат голем број состојби, но, сепак, потребно е да дознаете која е вистинската причина, дали е сериозна и како да си помогнете. Ова се најчестите состојби кои предизвикуваат отоци.
Топлина
Кога е топло крвните садови се прошируваат со цел да ослободат повеќе топлина и да го оладат организмот. Со истегнувањето на крвните садови дел од течноста преминува во меките ткива и доведува до оток. Ваквиот оток поминува откако ќе се раздвижите. Доколку не поминуваат со текот на времето и се придружени со болка, во тој случај обратете се кај вашиот лекар.
Преголем внес на сол
Кога внесуваме многу сол доаѓа до задршка на вода во телото која се складира насекаде, па и во вашите прсти. Ова поминува за еден ден, а за да не се јавува почесто, обидете да го тргнете соларникот од вашата маса. Преголемо количество сол ја оптоварува и работата на бубрезите, а штетно делува за целокупното здравје.
Остеоартрит
Со текот на годините доаѓа до оштетување и трошење на зглобовите. Преголемото триење може да предизвика и болка, оток, вкочанетост, ограниченост при движењето.Доколку покрај отоците имате и болни движења на прстите, станува збор за појава на остеоартрит.
Карпал тунел синдром
Карпал тунел синдромот настанува како резултат на компресија на n.mediuanus, нерв кој е задолжен за инервирање на мускулите на раката. Како резултат на тоа се јавува болка, топлина, трнење или вкочанетост на прстите. Статистиките покажуваат дека овој синдром се јавува трипати почесто кај жените отколку кај мажите.
Лимфедем
Лимфедемот се јавува кога лимфните јазли не прават соодветна дренажа, односно ослободување на телото од штетните материи, бактерии, вируси… Покрај отоците на рацете во овој случај се јавуваат и отоците и на рацете и нозете, се јавува чувство на затегнатост на кожата.
Прееклампсија
Отоците за време на бременост се очекувани. Но, доколку отоците се болни на допир треба да се консултирате и со вашиот гинеколог. Преeклампсија е состојба која се јавува исклучиво во бременоста и резултира со висок крвен притисок, зголемено присуство на протеини во урината и отоци. Се јавува кај 3-8 % од бремените жени и тоа најчесто по 20. недела од бременоста, а може да се појави и за време на породувањето или неколку дена по породувањето.
