Ултразвукот, популарно наречен ЕХО, е софистицирана метода за дијагностицирање на евентуалните аномалии во бременоста. Бројните истражувања докажаа дека ултразвукот не преставува никаква опасност за мајката и за плодот.
Имено, американските лекари десетина години го следеле развојот на децата чии мајки повеќепати биле изложени на ултразвучни прегледи во текот на бременоста. Резултатите покажале дека децата нормално напредуваат и дека прегледите со ултразвук не влијаеле негативно врз нивното здравје. Напротив, ултразвучните прегледи овозможуваат да се откријат евентуалните аномалии на плодот и се патоказ за лекарите во поставувањето на конечната дијагноза и натамошниот третман. Во текот на бременоста се препорачува секоја трудница да има најмалку три до четири прегледи со ултразвук.
УЛТРАЗВУЧЕН ПРЕГЛЕД ВО ПРВОТО ТРОМЕСЕЧИЕ
Првиот преглед со ултразвук треба да биде во првите три месеци од бременоста. Во овој период на бременоста ултразвучниот преглед на плодот е важен пред сe поради одредувањето на точниот стадиум на бременоста, но и поради скрининг-прегледот што овозможува детектирање на евентуалните аномалии на плодот. Од 11. до 14. гестациска недела се гледаат одредени знаци што можат да ни укажат на отстапувања во развојот на плодот и упатуваат на зголемен ризик од хромозомски абнормалности.
ПРВИ ЗНАЦИ ЗА ДАУНОВ СИНДРОМ
Најчеста хромозомска абнормалност што се јавува е трисомија на дваесет и првиот хромозом (Down syndrome) или попознато како монголоидизам. Постојат неколку ултразвучни знаци кои укажуваат дека е зголемен ризикот од Дауновиот синдром. Во првите три месеци од бременост, за да се процени ризикот од Дауновиот синдром,
се мери вратното здебелување (просторот меѓу кожата на вратот на бебето и ткивото на вратот). Неговото зголемување во висок процент асоцира на тоа дека станува збор за Дауновиот синдром. Другиот маркер во овој период е носната коска. Непостоењето на носната коска исто така, укажува на трисомија на 21. хромозом. Дали со откривањето на Дауновиот синдром бременоста ќе се прекине или не, сепак, одлучува мајката. Лекарите само дијагностицираат и укажуваат на последиците, конечната
одлука за прекин на бременоста е оставена на мајката. Мора да се нагласи дека хромозомските аберации не се нешто што може да се предвиди или да се спречи. Хромозомските дефекти не се наследни како генетските болести. Може да се јават во која било возраст на мајката, независно дали е во прашање прва бременост или претходно мајката има здрави новороденчиња. Сепак, со сигурност се знае дека
повозрасните мајки имаат зголемен ризик од раѓање дете со хромозомски дефект.
УЛТРАЗВУЧЕН ПРЕГЛЕД ВО ВТОРОТО ТРОМЕСЕЧИЕ
Вториот преглед со ултразвук лекарите го препорачуваат од 18. до 23. недела од бременоста. Во овој период детално се анализираат органите на плодот. Ова е период кога најрано имаме детален увид во структурата на органите на плодот. Посебно е
важно во овој период да се прегледа срцето и неговата градба бидејќи срцевите аномалии процентуално се најчести. Доколку се утврдат одредени аномалии,
треба да се процени нивната тежина и во зависност од тоа каков квалитет на живот би имал плодот се советуваат родителите за понатамошните постапки. Сепак, треба повторно да се нагласи дека последната одлука за понатамошниот тек на бременоста
останува на родителите на идното бебе. Овој преглед е исклучително важен и од аспект на евентуален прекин на бременост. Во случај да се открие аномалија кај плодот и се донесе одлука за прекин на бременоста, самиот чин е полесен од технички, а посебно од психолошки аспект за мајката.
УЛТРАЗВУЧЕН ПРЕГЛЕД ВО ТРЕТОТО ТРОМЕСЕЧИЕ
Третиот преглед е меѓу 28. и 30. недела од бременоста. Во овој период цел на прегледот е растот и големината на бебето. Намалена телесна тежина кај плодот се јавува доколку дојде до проблеми во крвотокот на мајката преку кој се храни детето (проблеми предизвикани од пушење, дијабетес, покачен крвен притисок…). Доколку циркулацијата не е добра, детето не ги добива потребните хранливи материи од мајката и затоа е со намалена телесн
а тежина. Ако ваков проблем се открие во
овој период, сепак, може да се дејствува во позитивна насока со одредени совети за исхрана и соодветна терапија. Сите горенаведени прегледи се вршат на таканаречен дводимензионален ултразвук.
ХИТ ТЕХНОЛОГИЈА
Со напредокот на технологијата во последните пет години хит во светот станува тродимензионалниот ултразвук или како најнапредна технологија четиридимензионалниот ултразвучен преглед. Оваа најнова технологија дава ултразвучен приказ на бебето кој е многу близок до реалноста. Оваа напредна технологија е од непроценливо значење за откривање одредени недостатоци на плодот, посебно надворешни манифестации како: расцепена или зајачка уста, криво стапало, недостиг на прсти, неправилна форма на глава итн. За оценка на структурата
на внатрешните органи (срце, мозок,бубрези итн.) сe уште неприкосновен е дводеминзионалниот ултразвук. Сепак, со сигурност се знае дека повозрасните мајки имаат зголемен ризик од раѓање дете со хромозомски дефект.
Комбинацијата на овие две ултразвучни технологии денеска ни овозможува навреме
да ги откриеме недостатоците на плодот. Откривањето, пак, на одреден дефект ни овозможува правилно да ја водиме бременоста т.е. да процениме дали аномалијата може по раѓањето да се елиминира и дали детето по раѓањето ќе има квалитетен живот. Во најлош случај, ако тој дефект не овозможува квалитетен живот, се препорачува бременоста да се прекине. На крајот ќе напоменеме дека сите најнови технологии ви се достапни во Клиничката болница „Аџибадем Систина”.
