Vogëlushi juaj ka disa ditë me kollë, temperaturë dhe ethe. Pas disa ditësh simptomat qetësohen, por për fat të keq, disa ditë më vonë, situata përsëritet. Kjo gjendje zgjat me ditë, ndërkohë që ju nuk e dini se për çfarë bëhet fjalë… nëse kjo ka të bëjë me të ftohtët, alergjinë apo me astmën? Fëmija është sëmurë ndërkohë që prindërit janë të shqetësuar. Ja se çfarë këshillon Dr. Tanja Jovanova, pediatër pulmoalergologe.
Ethet
Në rast se bëhet fjalë për alergji , atëherë fëmija juaj mund të ketë simptomat e mëposhtme: tështitje, sy të përlotur, kruarje të syve dhe të hundës, si dhe dhimbje fyti. Nëse këto simptoma bëhen më intenzive kur fëmiuja është jashtë dhe ndodhet pranë poleneve, mund të bëhet fjalë për alergji ndaj polenit. Zakonisht, ftohja shfaqet gradualisht, do keni rrjedhje të hundës, do t’ju shfaqet kruarje e syve dhe ethe të lehta.
Sa zgjasin simptomat?
Të ftohtit ka tendencë të zgjasë rreth dy javë, ndërkohë që alergjia zgjat shumë më tepër. Alergjia nazale ( e hundës) mund të zgjasë gjatë gjithë vitit, veçanërisht është aktive gjatë muajve të shfaqjes së polenit. Fëmija juaj mund të ketë kollë dhe tështitje edhe në ambiente të mbyllura. Nëse është alergjik ndaj pluhurit apo ndaj kafshëve shtëpiake të cilët janë shkaktarë të alergjisë, këto simptoma fëmija mnd ti ketë gjatë gjithë vitit.
Lidhja me stinët e vitit
Në pranverë, atëherë kur çelin pemët dhe lulet, poleni është kudo rreth nesh. Nëse fëmija juaj teshtin vazhdimisht, merr frymë me vështirësi dhe i rrjedhin hundët, me siguri, shkaktar për këtë është poleni. Edhe gjatë verës, reaksioni alergjik mund të shkaktohet nga poleni, bari, myku dhe pickimet nga insektet. Muajt e verës gjithashtu lidhen me alergjinë e polenit dhe ushqimit. Kjo ndodh atëherë kur gjatë konsumimit të frutave dhe perimeve përmes gojës futet dhe poleni. Simptomat mund të shfaqen në periudha të ndryshme të ditës. Nëse fëmija nuk dëshiron të hajë, zgjohet nga gjumi me hundë të bllokuara, teshtinë, kollet, shkak për këtë mund të jetë alergjia ndaj pluhurit në shtëpi dhe qimeve të kafshëve shtëpiake. Nëse fëmija juaj është i bllokuar gjatë stinës së dimrit, ka sekrecione në hundë, i lotojnë sytë dhe ka kruarje të tyre, në këtë rast është e mundur që të kemi të bëjmë me të ftohtë. Konsultohuni me pediatrin tuaj ose me mjekun alergolog.
Astma dhe mosha e fëmijës
Sipas studimeve mjekësore, astma zakonisht shfaqet rreth moshës 6 vjeçare, ndërsa alergjitë shfaqen në çdo moshë dhe në çdo periudhë të jetës. Jemi dëshmitarë dhe të vetëdishëm që fëmijët e porsalindur janë alergjikë ndaj disa llojeve të caktuara të ushqimeve. Alergjitë në natyrë mund të shfaqen rreth moshës 4-6 vjeçare, ndërsa alergjitë në ambiente të mbyllura mund të shfaqen edhe nën moshën 4 vjeçare. Në rast se simptomat përkeqësohen, apo në rast se fëmija juaj ka ekzemë (inflamacion të lëkurës), është koha që të bëni test për alergji. Nëse alergjia apo ekzema është shaqur tek fëmijët më të vegjël se 6 vjeç, ka të ngjarë që tek ky fëmijë gjatë jetës të shfaqet astmë.
Bllokim i hundës
Nëse vogëlushi juaj ka vazhdimisht rrjedhje të hundës, nëse sekrecioni është transparent dhe i hollë, bëhet fjalë për alergji. Ndërkohë që sekrecionet e trasha dhe me ngjyrë jeshile, zakonisht lidhen me infeksione ose viruse. Bllokimi i hundës mund të zgjidhet me anë të inhalimit ose me ilaçe.
Historia familjare
Në rast se ndponjëri nga prindërit ka alergji, ka shumë të ngjarë që kjo të ndodhë edhe tek fëmija. Mundësia rritet dyfish në rast se të dy prindërit janë alergjikë. Po e njejta gjë vlen edhe përsa i përket astmës. Sëmundja do të shfaqet tek 25 – 30% e fëmijëve. Një numër i madh i personave të cilët vuajnë nga astma, vuajnë gjithashtu edhe nga alergjia. Doktorët këtë fenomen e quajnë ‘astmë alergjike’, shkaktarë për këtë mund të jenë poleni, lëkura e kafshëve, myku.
A mund të jetë astmë?
Kjo pyetje është prioritet për personatë të cilët kanë alergji. Nëse astma nuk trajtohet mund të jetë e rrezikshme për jetën. Simptomat e astmës manifestohen me vështirësi në frymëmarrje, kollitje gjatë natës, gjatë vrapimeve apo kur fëmija qesh, gjithashtu manifestohet me një lloj fishkëllime në gjoks, me frymëmarrje të shkurtra dhe të shpeshta , me lodhje gjatë aktiviteteve fizike dhe shpesh edhe me ftohje.
Edhe pse astma zgjat gjatë gjithë vitit, kulmin e manifestimit e arrin në fillim të vjeshtës dhe gjatë dimrit. Ndryshe nga alergjitë, viruset dhe stresi gjithashtu mund të jenë shkak për shfaqjen e astmës. Edhe personat të cilët kanë astmë dhe alergji, gjithashtu mund të marrin të ftohtë. Kontaktoni me pediatrin tuaj në rast se ndonjë nga këto simptoma shaqen tek fëmija juaj. Sëbashku me doktorin tuaj, ju mund ta ndihmoni fëmijën tuaj që të ndihet më mirë.
