Përshëndetje,
Jam 41 vjeçe, kam kryer gjithmonë kontrolle të rregullta dhe gjithçka ka qenë siç duhet. Para një viti më kanë filluar simptomat e menopauzës. Ndonjë muaj kam menstruacione, ndonjë muaj nuk kam. Tani kam gjakderdhje gjatë gjithë muajit, ndonjëherë më shumë ndonjëherë më pak , por nuk ndalon. Kam shkuar tek gjinekologu, më ka thënë se tani për tani është gjithçka në rregull, por nëse gjakderdhja vazhdon për një kohë më të gjatë duhet të kryej kontroll. Do të doja të dija nëse kjo është diçka serioze apo është çrregullim hormonal , dhe nëse duhet të pij diçka për ta ndaluar gjakderdhjen apo duhet të bëj pastim (curettage). Faleminderit dhe do t’ju lutesha që të më përgjigjeni sa më shpejtë të jetë e mundur. Gjithë të mirat!
Dr. Irena Shuplinovska Jordanovska, gjinekologe akushere
Duke marrë parasyshë moshën mesatare në të cilën gratë futen në menopauzë (48-55 vjeç), në rastin tuaj është ende herët që të shfaqet menopauza. Përsa i përket menopauzës së parakohëshme, ajo shfaqet para moshës 40 vjeçare. Por simptomat lidhur me menopauzën shfaqen disa vite më parë, me çrregullim të ciklit menstrual. Kjo periudhë është e njohur si perimenopauzë, dhe është si rezultat i reduktimit të funksionimit të vezoreve dhe mungesës së ovulacionit. Nuk përmendët nëse keni simptoma të tjera që lidhen me perimenopauzën siç është nxehtësia, djerëstja, paqëndrueshmëri të presionit të gjakut, ndryshime të gjendjes tuaj të humorit, etj. Gjithësesi, çrregullimet e ciklit duhet të shqyrtohen për të parë nëse bëhet fjalë për ndryshime hormonale apo bëhet fjalë për ndonjë çrregullim organik siç është për shembull polipi, trashja e mukozës së mitrës (endometrium), kist në vezore, miom dhe sigurisht nuk mbeten pas disa prej sëmundjeve më serioze të cilat fillojnë të shfaqen në këtë moshë siç është kanceri i mitrës apo kanceri i qafës së mitrës. Është e nevojshme që të kryeni PAP test nëse deri tani nuk e keni kryer. Kiretazha është një metodë diagnostikuese dhe terapeutike gjatë të cilës me anë të një instrumenti të veçantë pastrohet mukoza e qafës së mitrës dhe e brendësisë së mitrës dhe më pas dërgohet për kryerjen e analisës histopatologjike. Nëse duhet të kryhet apo jo, këtë gjë duhet ta përcaktojë doktori në bazë të të dhënave të detajuara, kontrollit me spekulum dhe kontrollit me ultratingull me anë të të cilit vërehet dhe përcaktohet mukoza e mitrës ( endometrium) trashësia dhe gjendja e saj. Shpesh gjakderdhjet të cilat zgjasin në këtë moshë trajtohen me kiretazh (curettage).
Duke pasur parsyshe se ende jeni e re në moshë për të hyrë në menopauzë, është e nevojshme që të bëni statusin hormonal sëbashku me statusin e tiroideve dhe doktori me anë të ultratingullit, vërtetë do të mund të shohë nëse keni hyrë në menopauzë apo bëhet fjalë për një problem tjetër hormonal. Nëse nuk keni ndonjë kundërindikim mund të ju këshillojë edhe terapi me zëvendësim të hormoneve.
