Се мачите да заспиете веќе со недели и месеци и секој ден се прашувате кога ќе помине овој кошмар. Сѐ додека не почнете да делувате во вистинската насока и сериозно да посветите внимание на овој проблем, несоницата ќе ве измачува во недоглед. Прочитајте неколку факти и митови што ќе ви помогнат да ја дознаете вистината за проблемот со спиењето.
Вежбањето може да помогне
Факт. Редовните вежби се одличен начин да го подобрите сонот. Ако имате проблеми со спиењето, пробајте да не работите до доцна навечер. Истото се однесува и за вежбањето. Напорните вежби ја зголемуваат температурата на телото и ве прават будни и енергични. Затоа избегнувајте да вежбате 3 до 4 часа пред заспивање.
Телевизорот и компјутерот помагаат да заспиете
Мит. Гледањето телевизија и седењето пред компјутер може само да ве стимулира. Гласот и интензивната светлина го намалува нивото на мелатонин кој помага да заспиете. Најдобар совет за зголемување на нивото на мелатонинот е да слушате тивка релаксирачка музика пред спиење.
Алкохолот помага да заспиете
Мит. Доколку мислевте дека чаша алкохол пред заспивање е формулата за длабок сон, истражувањата покажуваат дека тоа не е вистина. Ваквата мисла можеби потекнува од фактот што алкохолот може да ве направи поспани. Но, како што минува низ вашето тело алкохолот води до вознемиреност, немирен сон и може да направи да се разбудите порано.
Апчињата за заспивање се безбедни
Мит. Денешните апчиња се побезбедни и поефикасни споредбено со оние од минатото. Но, факт е дека тие само помагаат да се намалат симптомите на несоницата, но не ја лечат. Тука постои и ризик за појава на зависност од истите. Затоа, пред да земете какво било апче, консултирајте се со вашиот лекар. Најдобриот начин за надминување на несоницата е да ја отстраните главната причина и да создадете услови за лесен сон.
Може да ги надоместите изгубените часови сон
Мит. Не можете во целост да ги надоместите часовите на сон кои ги „пропуштате“ секојдневно. Спиењето еднаш до двапати во неделата или за време на викендот само го поместува вашиот биолошки часовник. Ваквото нередовно спиење може да предизвика уште поголеми потешкотии при заспивањето. Основниот начин да постигнете оптимални часови на сон е повторно да го вратите редовниот сон.
Со текот на време се навикнувате на помалку сон
Мит. Верувањето во овој мит води до сѐ поголеми проблеми. Не е точно дека телото може да се навикне без сон бидејќи на секој организам му е потребно 7-8 часа сон. Хроничниот умор може да биде причина за намалена физичка активност, намалена способност за концентрација и работа, а тоа води до можна појава на сообраќајна несреќа или генерално да доведе до нарушено здравје.
Станете од кревет доколку не можете да заспиете
Факт. Лежите пола час до час, слушате тивка музика и полека се подготвувате за спиење. Но, доколку поминува подолго време а вие сѐ уште сте будни, не останувајте во кревет бидејќи тогаш сѐ се сведува на гледање во часовникот.
Проблемите со спиењето ќе исчезнат сами по себе
Мит. Сѐ додека не ја утврдите основната причина што ве прави будни во текот на ноќта (стрес, лекови, болест …) не очекувајте дека несоницата ќе помине сама од себе. Време е да разговарате со вашиот доктор, тоа е првиот чекор во лекувањето на несоницата.
