Отоците настануваат како резултат на задржување на водата во зглобовите и долниот дел на нозете. Постојат голем број состојби и болести кои може да бидат причина за појава на отоците. Најчести причини се: прекумерна телесна тежина, срцева или бубрежна слабост, остеоартрит, цироза, скршеница, потхранетост, висок крвен притисок, намалена функција на тироидната жлезда, ПМС, нарушена циркулација, болест на крвните садови… Под влијание на хормоните, отоци се јавуваат и за време на бременоста.
Појавата на отоци во нозете и стапалата е непријатно чувство кое го нарушува нормалното движење. Со практикување на неколку совети може да ги намалите отоците и болката во стапалата и зглобовите.
- Медицински чорапи за венска компресија. Медицинските чорапи ќе ви помогнат при намалување на болката и ќе го спречат собирањето течност во нозете и стапалата. Особено е важно при избирањето на големината на чорапите, тие да не бидат претесни.
- Подигнете ги благо нагоре нозете. Секогаш кога седите, а нозете ви се спуштени надолу имајте навика секогаш да ги поставите нозете благо кренати. Различни јога положби, особено онаа кога сте легнати на подот, а нозете кренати и потпрени на ѕидот може да помогнат во намалување на отокот.
- Вежбајте. Седење и стоење во едно место може да ги зголеми отоците во нозете. Спорт кој е особено е корисен и се препорачува кај отечени нозе е пливањето.
- Намалете ја тежината. Еден од главните ризик фактори за појава на отоци е прекумерната тежина. Со намалувањето на килограмите се намалуваат и отоците.
- Избегнувајте солена и зачинета храна. Ваквиот внес на храна ја задржува водата во организмот и може да ги зголеми отоците.
- Додадете магнезиум. Се смета дека внесот на магнезиум ќе ја намали задршката на вода и ќе ја олесни болката во нозете.
- Не носете тесни чевли. Доколку чевлите ги чувствувате како неудобни и тесни и по неколку носења, заменете ги со други. Тесните чевли прават притисок на ногата, што може да доведе до појава на болка во нозете и забавена циркулација која ќе резултира со оток.
Посетете веднаш лекар доколку отокот се јавува само на едната нога бидејќи може да биде еден од знаците за длабока венска тромбоза. Доколку покрај отоците се појават и плускавци и рани на нозете исто така треба да се упатите на лекар бидејќи во овој случај може да се работи за појава на инфекција.
