Кардиохируршките интервенции се едни од најсложените операции. Со зголемување на бројот на кардиоваскуларните заболувања, операциите на срце бележат значителен пораст на светско ниво. За многу пациенти кои се во очекување да бидат оперирани, како и за оние кои не се осмелиле да се јават кај кардиохирург поради страв дека ќе им биде предложено хируршко лекување им даваме одговор на најважните прашања кога станува збор хируршка интервенција на срцето.

Функцијата на панкреасот е од клучно значење во разградувањето на храната и во регулирање на метаболизмот на шеќерот во крвта. Воспалението на панкреас може да се манифестира со релативно лесна клиничка презентација, па сè до тешки облици кои доведуваат до животнозагрозувачки компликации. Д-р Димитар Трајков, гастроентерохепатолог објаснува какви симптоми даваат акутниот и хроничниот панкреатитис, што најчесто ги предизвикува и кога е потребна консултација со доктор.

Срцевите аномалии се јавуваат кај 6-8 на 1000 новороденчиња. Вообичаени симптоми се сина боја на кожата и усните, отежнато дишење и тешкотии во исхраната. Сепак, некои од децата немаат никакви симптоми и родителите не знаат дека нивното дете има проблеми со срцето. Според д-р Драшко Димески, педијатар кардиолог, потребен е редовен скрининг на срцето во бременоста како и кај новороденчето доколку има потреба.

Субакутниот тироидит претставува воспаление на тироидната жлезда предизвикано од вируси. Кај најголем број од пациентите пред појавата на тироидитот најчесто претходи некоја респираторна инфекција на горните дишни патишта. Д-р Билјана Црцарева, специјалист по нуклеарна медицина, објаснува дека на почетокот на заболувањето се јавуваат знаци на виремија, односно кај пациентот се јавува општа слабост, болки во мускулите и потење за некој ден подоцна како главен симптом да се јави болка во предел на вратот, односно во предел на тироидната жлезда.

Ендокардитис е воспаление или инфекција на внатрешната (endokardialna) површина на срцето кое може да вклучува една или повеќе валвули или други структури. Според проф. д-р Салис Таџер, кардиохирург, ендокардитисот често е предизвикан од бактерии кои нормално живеат на кожатa, во внатрешноста на дигестивниот тракт или во уринарниот тракт.

Артериите се како дрво. Аортата е стеблото што се разгранува на сè помали гранки и завршува со гранчиња на листовите. Артериосклерозата како процес на таложење масни материи и калциумови соли го зафаќа стеблото, големите гранки сè до гранчињата на листовите, а шеќерната болест ги уништува гранчињата на листовите. Според д-р Митко Караѓозов, тораковаскуларен хирург во Клиничката болница „Аџибадем Систина“, кај долгогодишни пациенти со шеќерна болест настанува уништување на крвните садови, односно гранчињата на листовите, и настанува дијабетична ангиопатија. Сето ова доведува до намалување на исхраната на ткивата на периферијата.

Подолго време по социјалните мрежи се споделуваат различни препораки за тоа како да си помогнете при појава на првите знаци на срцев удар.  Споделената препорака е да се почне со брзо и длабоко кашлање, кое треба да го одржи во свест пациентот и да му помогне да ја преживее кризата. Д-р Оливер Бушљетиќ, интервентен кардиолог, вели дека во реалниот живот, оваа состојба се развива брзо и пациентот нема време за реакција. Прочитајте ги неговите стручни совети за прва помош при појава на знаци на срцев удар.

„Исклучително важен е периодот од почетокот на срцевиот удар до првиот контакт со доктор, односно поставување на дијагнозата срцев удар. Во првите часови од почетокот на срцевиот удар, најголема опасност се т.н. живото-загрозувачки пореметувања во работата на срцето како изразито бавна срцева работа или изразито брза срцева работа.“ вели д-р Бушљетиќ.

Анемија е состојба која се јавува кога крвта нема доволно црвени крвни клетки (еритроцити) или хемоглобин. Хемоглобинот претставува главен составен дел на црвената клетка чија улога е да го носи кислородот до клетките. Затоа, доколку имате намален број црвени крвни клетки или намалени вредности на хемоглобинот, клетките во вашето тело нема да бидат во можност да добиваат доволно кислород.

Ангина пектрорис е медицински термин за болка во градите како последица на коронарна болест на срцето. Таа се манифестира со намален проток на крв во срцевиот мускул поради насобраните масни наслаги кои прават стеснување во артериите. Пациентите чувствуваат болка, стегање и притисок во градите. Ангината е релативно честа појава и тешко може да се разликува од другите болки во градите.  

Деветте изведени студии кои опфатиле дури 430 000 испитаници докажуваат дека пиењето кафе делува поволно врз работата на црниот дроб и доведува до значително намалување на ризикот од развој на цироза.

Појавата на цироза на црниот дроб се јавува како резултат на вирусно заболување (хепатит Б и Ц), а може да се јави и како резултат на прекумерно пиење алкохол и одредени лекарства. Цирозата се развива бавно при што здравото ткиво на бубрегот преминува во сврзно ткиво и како такво не е во можност да ги обработува протеините, хормоните, лековите и токсините. Исто така, се на намалува и способноста за создавање протеини и други супстанци важни за дигестивниот систем и елиминацијата на токсините. Над  еден милион луѓе годишно во светот умираат од оваа болест.