Златен стандард во дијагноза и третман на болести на жолчното кесе, жолчните патишта и панкреасот
ERCP (ендоскопска ретроградна холангиопанкреатографија) претставува неоперативна инванзивна ендоскопска процедура која се користи за дијагноза и третман на заболувања на жолчното кесе, жолчните патишта и панкреасот (билиарно-панкреатичниот систем). Д-р Димитар Трајков, гастроентерохепатолог, вели дека во последната деценија ERCP примарно се користи во терапевтски цели, а сè поретко како дијагностичка метода. Покрај развојот на многу нови неинванзивни методи MRCP – магнетна резонанца, EUS – ендоскопски ултразвук, ERCP останува златен стандард како во дијагностичките така и во терапевтските процедури на билиарниот и панкреатичниот канален систем.
Како се изведува?
За време на ERCP, гастроентерологот специјализиран во областа на ендоскопски интервентни процедури користи специјален апарат – ендоскоп (дуоденоскоп) со кој преку устата на пациентот, преку желудникот и тенкото црево, со специјални додатоци и алатки навлегува во жолчниот и панкреатичниот канален систем. Во оваа метода како составен дел од процедурата се користи и рендген апарат (флуороскопија). Пациентот во текот на процедурата е во кратка интравенска анестезија.
Индикации за ERCP
- Жолтило предизвикано од затнување на жолчниот вод
- Камења во жолчниот вод
- Стеснувања на жолчниот канал предизвикано од бенигни или малигни процеси
- Компликации на жолчниот вод од претходни оперативни процедури
- Хронично воспаление на панкреасот
ERCP во терапевтски цели
Покрај дијагностика, оваа метода е доста ефикасна во третман на голем број состојби и со негова примена се изведува:
- Ендоскопска сфинктеротомија (сечење и проширување на почетниот дел на жолчниот канал со специјален нож – сфинктеротом)
- Отстранување камења од жолчниот вод
- Поставување стент во жолчниот канал за премостување на стеснувања во каналниот систем
- Проширување (дилатација) на стеснувања на жолчниот вод
- Поретки други индикации (папилектомии, биопсија на жолчниот вод, отстранување ехинококови цисти… )
Компликации
ERCP е инванзивна процедура кај која постои можност за појава на компликации, кои најчесто се од лесен тип – реактивно воспаление на панкреасот (5% од пациентите). Поретко има потешки облици на панкреатитис, за кои е потребен интензивен хоспитален третман (под 1%) Поретки компликации се:
- Перфорација на тенко црево
- Крвавење
- Алергиска реакција на контрастот користен во процедурата
- Кардиопулмонални компликации, воспаление на жолчниот вод – холангитис
