Нашиот ум треба да ни биде сојузник, а не непријател!
Едно од најголемите прашања со кои се соочуваат многу психотерапевти и советници е како да го скротите вашиот ум и да го претворите во сојузник наместо непријател.
Нашите секојдневни маки и грижи, пред сѐ, се од психичка природа. Се грижиме до мера на опсесивност. Нè гонат некои дамнешни проблеми, но се грижиме и за проблемите со кои допрва треба да се соочуваме. Луѓето постојано си поставуваат прашања од типот што не е во ред со мене? Што ќе ми се случи? Како ќе се извлечам од оваа ситуација?
Некогаш е премногу тешко да ги оттргнете овие мисли, дури мислите дека самите од себе никогаш нема да исчезнат.
Еве кратка анализа на неколку од прашањата.
Што не е во ред со мене?
Ваквите мисли се раѓаат кога чувствувате несигурност, сомнеж и постојано самоосудување. Кога сте во ваква ситуација и пробувате мислите да ги победите со тоа што постојано ќе си велите дека со вас апсолутно е сѐ во ред, тогаш не постигнувате ништо, проблемот останува, а суштински ништо не решавате. Решението е да се посветите на себе и да си ја вратите самодовербата.
Што ќе се случи?
Ова е клучно прашање кое си го поставувате кога немате доверба. Во животот никогаш не се знае што точно ќе се случи понатаму. Прифатете го фактот дека иднината не е нешто што е непознато само за вас, туку останува тајна и за сите нас. Колку и да се грижите, ништо не можете да промените.
Како ќе се извлечам од ова?
Ова прашање најчесто е резултат на тоа што се чувствувате како да сте фатени во стапица. Со цел да се ослободите од ова чувство, морате да ослободите поголем простор за својата креативност. Нема да постигнете никакво решение доколку сте во паника. Затоа, наместо да се чувствувате како затвореник, гледајте на проблемот како шанса да се докажете. Кога ќе се ослободите од стравот, ќе ви се отвори канал за нови решенија.
