Децата се секогаш во движење, секогаш во потрага по нови нешта кои целосно им го одземаат вниманието. Ќе се согласите дека хранењето некогаш ви се чини како невозможна мисија. Тие не ни помислуваат да застанат да се напијат вода иако реално имаат потреба. На нас, родителите, ни преостанува секогаш да одиме зад нив и да ги задоволиме потребите за глад и жед.
Посебно е важно децата да бидат добро хидридани во топлите денови, кога повеќе се потат и губат течности кои треба да се надоместат. Но, постои уште поважна работа, а тоа е што ќе им дадете да се напијат? Многу од соковите кои ги купуваме содржат толку многу шеќер што е штетен за детскиот организам. Покрај шеќерот, внимавајте со соковите кои содржат и кофеин. Што е најдобро за вашето дете? Во продолжение прочитајте ги нашите совети.
Вода. Водата е најдобриот пијалак за вашето дете. Хидрира и ја гаси жедта а не содржи дополнителни шеќери, масти и калории.
Млеко. Млекото е важен дел од исхраната кај децата. Содржи протеини, витамин Д и калциум. Можете да го давате во најразлични форми како соино млеко, бадемово млеко, кокосово и сл.
Природни сокови. Доколку сакате да му дадете на детето сок, идеален избор е цедено овошје. Содржи здрави шеќери кои му се потребни на детскиот организам. Ваквиот сок препорачливо е да се испие веднаш по цедењето за да се искористат сите витамини.
Засладувачи на млеко. Чоколадното млеко и разните видови вкусови на млеко се лош избор за хидратација на вашето дете. Содржат додадени шеќери кои треба да ги одбегнуваат и возрасните, а што повеќе децата.
Овошни сокови. Не залажувајте се доколку прочитате на амбалажата на сокот – 100 % витамин Ц. Ако детето јаде овошје во текот на денот, бидете сигурни дека има доволно витамин Ц. Ваквите сокови содржат дополнителни количини шеќер и не се вистинскиот избор. Секојдневното пиење на ваквите сокови можат да го наруши здравјето на детските заби.
Спортски пијалаци. Спортските пијалаци ветуваат целосна хидратација, но на децата не им се потребни дополнителни шеќери, тиамин и вишок калории кои ги содржат ваквите пијалаци. Некои од спортските пијалаци содржат и мали количини кофеин.
