Што е остеопороза?
Остепорозата ги ослабува коските и го зголемува ризикот од појава на ненадејни фрактури. Последиците од скршениците понекогаш можат да бидат и многу сериозни.
Кои се причините за остеопорозата?
Остеопорозата е најчесто заболување кое ги напаѓа коските. Една од причините за појава на остеопорозата е намалувањето на нивото на естроген. Исто така, намалениот внес на калциум, намалената физичка активност, како и пушењето цигари можат да доведат до ова заболување.
Луѓе кои можат да подлежат на ова заболување
Основни ризик фактори на остеопорозата се:
– Возраста. Од моментот кога вашите коски ја имаат најдобрата структура и сила, на 30-годишна возраст, коскената маса почнува да се намалува.
– Полот. Жените кои имаат над 50 години се под најголем ризик од развивање на остеопороза. Всушност жените се 4 пати поподлежни на ова заболување бидејќи имаат послаби и потенки коски.
– Структурата на коските и телесната тежина. Ситните и слабите луѓе се под поголем ризик од ова заболување.
– Семејна историја. Ова е еден од најважните ризик фактори за остеопорозата. Доколку некој од вашите предци имал какви било симптоми на остеопороза, од типот на скршеница на колк по најмал пад, тогаш и вие сте во ризичната група за ова заболување.
– Доколку честопати сте имале скршеници.
– Пушење цигари. Пушењето предизвикува поголем ризик од остеопороза и скршеници.
– Алкохол. Прекумерното пиење алкохол може да доведе до тенчење на коските и зголемување на ризикот од скршеници.
– Некои други заболувања. Другите заболувања, од типот на ревматоиден артритис може да го зголемат ризикот од појава на остеопороза.
– Некои лекови. Прекумерното и постојаното користење стероиди (преднисон).
Превенција
Остеопорозата може да се појави и како резултат на факторите кои нè опкружуваат, но и поради генетските фактори. Затоа, за да се заштитиме од ова заболување или да го спречиме губењето на коските, најпрвин треба да се едуцираме во врска со ризиците од остеопорозата.
Витамин Д за остеопороза
Редовно внесување калциум и витамин Д е многу важно во процесот на одржувањето на густината на коските бидејќи витаминот Д помага во процесот на апсорпција на калциумот. Овој витамин го внесуваме преку исхраната и кожата. Внесот на витаминот Д преку кожата зависи од тоа колку време сте изложени на сонце. Луѓето кои живеат во места каде што има повеќе сонце во текот на денот се снабдуваат со поголема количина витамин Д преку нивната кожа.
