Многу актуелна тема во последно време се здравата исхрана и здравиот начин на живеење. Во деновите кога започнуваат божиќните пости, кои се најдолги, заедно со велигденските, се наметнува прашањето дали постите се вклопуваат во здравиот начин на живеење и на здрава исхрана.
Според црквата, постот подразбира телесно и духовно прочистување. Телесниот пост, во потесна смисла на зборот, е воздржување од одредени видови храна во одредени денови и временски периоди.
Духовниот пост, пак, подразбира љубов и грижа кон блиските и околината, смиреност, трпение, милост и помош за сиромашните. Самата религија ги формирала правилата за телесен и за духовен пост. Меѓутоа, во исто време, религијата вели дека не можат сите луѓе да се придржуваат кон строгите правила за пост. Одредени категории луѓе: деца во развој, изнемоштени и стари лица, болни, луѓе со тешка физичка активност, жени за време на бременост и доење не мора да се придржуваат кон строгите правила за пост.
Здравата исхрана и начинот на живот се основата во превенцијата од многу заболувања, во нормален ментален и телесен развој. За нормално функционирање и развој на човекот, потребни се околу 50 нутритиви, кои се внесуваат исклучително со храната. Нутритивите што човечкиот организам не може да ги произведе, се есенцијални, пример омега-3, омега-6, итн. Правилната исхрана подразбира внесување одреден сооднос на протеини, јаглехидрати, масти, витамини, минерали. Секое несоодветно консумирање на овие нутритиви води до нарушување на метаболната рамнотежа и развој на болести.
Да се потсетиме на основните правила за здрава исхрана и живеење.
– Редовна исхрана – поделена во 3 оброци, со 2 ужини.
– Разновидност во исхраната.
– Внесување вода и течности во доволни количини, минимум 2 литра.
– Внесување витамини и минерали преку свежи овошје и зеленчук.
– Внесување умерени количини храна, во зависност од дневната потрошувачка и на тој начин одржување оптимална телесна тежина.
– Намалено внесување масти од животинско потекло.
– Намалено внесување слатка храна, шеќерот да се замени со мед, малтекс, фруктоза.
– Намалено внесување солена храна.
– Консумирање умерени количини алкохол, 1-2 чаши црвено вино…
– Редовна и правилна физичка активност.
Со придружување кон основните правила за исхрана и здрав живот се добива позитивен ефект врз здравјето, се зголемува работоспособноста и се продолжува работниот век на човекот.
Само доколку ги вклопиме основните правила за здрава исхрана и живот за време на постот, може да зборуваме за позитивен ефект на постот. Но поради специфичниот социо-економски профил на луѓето од овие простори, можеме да кажеме дека има позитивен и негативен аспект на постот во однос на здравите храна и живот.
Негативниот аспект произлегува од консумирањето еднолична храна, внесувањето повеќе тестенини и јаглехидрати и со тоа нарушување на дневниот внес на нормалниот сооднос на нутритиви.
Позитивниот аспект од постот произлегува од јакнењето на духот и на менталниот склоп на човекот со секојдневен тренинг да се воздржи од предизвиците на прекумерна и неквалитетна (вкусна) храна.
Се надевам дека оној што посветува внимание на здравата храна и начинот на живеење долги години, ќе може да го вклопи тој стил во постот и да ги добие сите благодати од постот.
