Nëse keni këmbë të ftohta dhe keni pësuar ndryshim të thonjve dhe lëkurës së këmbëve, nëse keni dhimbje të pëllëmbës së këmbës gjatë ecjes, nëse çdo 50 metra duhet të ndaloni për të pushuar nga dhimbja, ose nëse keni ndryshime, shfaqje të pikave të zeza në këmbë , konsultohuni menjëherë me mjekun. Gjatë kryerjes së kontrollit do të vërehet nëse keni sëmundje të arterieve, dhe nëse keni, duhet të filloni me trajtimin, pasi çdo plagë, sado e vogël që të jetë e shkaktuar nga prerja e thonjve apo çdo shtrëngim i këmbës nga këpucët, mund të jetë një hyrje për infektimin e plagëve.
Gjashtë shenja paralajmëruese për shëndetin vaskular
Simptomat në lidhje me sëmundjen e arterieve shfaqen shumë herët, por, për fat të keq, shumë pak persona arrijnë ti njohin. Lexoni gjashtë simptomat më të shpeshta të cilat tregojnë se keni probleme me shëndetin tuaj vaskular.
1.Dhimbje gjatë lëvizjes dhe gjatë pushimit
Shfaqja e dhimbjes gjatë lëvizjes është një simptomë tipike e sëmundjes së arterieve. Sa më shumë zvogëlohet rrjedhja e gjakut nëpër arterie për shkak të substancave të akumuluara yndyrore,dhe kriprave kalcium brenda arteriosklerozës ose bllokimit të arterieve si pasojë e sëmundjes së sheqerit, zvogëlohen metrat në gjatësinë e ecjes. Kështu pacienti do të ankohet se pas 300 metrash ecje do të duhet të ndalojë për të pushuar dhe më pas të vazhdojë edhe 300 metra të tjera. Me përparimin e procesit të bllokimit reduktohet edhe gjatësia e ecjes pa pushim, derisa të filloni të ndjeni dhimbje edhe kur bëni pushim. Shfaqja e dhimbjeve edhe atëherë kur pushoni, tregon se arteriet janë krejtësisht të bllokuara, dhe ushqimi i indeve është reduktuar deri në atë fazë për të mbijetuar.
2.Ndryshimi i ngjyrës së lëkurës dhe thonjve të këmbëve. Kur indet e këmbëve vuajnë për ushqim, lëkura bëhet ishemike dhe e zbehtë, qimet bien dhe kështu ndodh atrofia e thonjve.
3.Këmbë të ftohta
Si pasojë e reduktimit të ushqimit të indeve të këmbëve, shputat e këmbëve mbeten të ftohta.
4.Ndjeshmëri të reduktuar
Për shkak të reduktimit të ushqimit, fillimisht vuajnë nervat përfundimtare.
Si pasojë e kësaj është reduktuar ndjeshmëria ndaj të ftohtit dhe të nxehtit si dhe ndaj prekjes.
5. Plagë të hapura në majë të gishtave
Pikat e zeza të cilat përhapen nga dita në ditë, veçanërisht në ato pjesë të këmbëve të cilat janë të ekspozuara ndaj lëndimeve të vazhdueshme të këpucëve, është nekrozë. Kjo është shenja e parë serioze e cila tregon se indi nuk ushqehet siç duhet.
6.Gangrena
Sipërfaqe të mëdha të lagështa ose të thata të cilat shfaqen si rezultat i indit të rrënuar të shoqëruar me erë jo të mirë intenzive quhet gangrenë.
